Fréttir

Fjárhagsáætlanir Sveitarfélagsins Skagafjarðar fyrir árin 2016-2019 voru samþykktar samhljóða með atkvæðum allra sveitarstjórnarfulltrúa við síðari umræðu á fundi sveitarstjórnar í gær. Helstu fjárfestingar ársins 2016 verða vegna Sundlaugar Sauðárkróks, byggingu vatnstanks fyrir kalt vatn á Gránumóum, hitaveituframkvæmda í Fljótum, skjólgarðs við smábátahöfnina á Sauðárkróki og kaupa á slökkvibifreið.

Nú er tíðarfar umhleypingasamt og mikil hálka á ýmsum stöðum. Sandkisturnar sem komið var fyrir í fyrravetur eru enn á sínum stað með saltblönduðum sandi sem öllum er velkomið að nota til að salta í kringum hús sín.

Lúsíuhátíð 6. bekkjar Árskóla er á morgun fimmtudaginn 10. desember. Lúsíurnar verða á ferðinni um Krókinn og munu syngja á ýmsum stöðum. Hátíðin endar í matsal Árskóla kl 17 með sannkölluðum Lúsíusöng og eru allir velkomnir í skólann.

Hefðbundið skólahald verður í Árskóla á Sauðárkróki í dag en Grunnskólinn austan Vatna og Varmahlíðarskóli verða lokaðir. Leikskólinn Ársalir verður opinn en Tröllaborg og Birkilundir lokaðir.

Fundur verður haldinn í sveitarstjórn Sveitarfélagins Skagafjarðar, miðvikudaginn 9. desember kl. 16:15 í ráðhúsinu á Sauðárkróki

Almannavarnanefnd ríkislögreglustjóra og Almannavarnarnefnd Skagafjarðar hafa lýst yfir óvissustigi vegna fárviðris. Víðtækar lokanir vega verða í gildi í Skagafirði. Í dag klukkan 16:00 verður eftirfarandi leiðum lokað: Vatnsskarð, Þverárfjallsvegur, Siglufjarðarvegur og Öxnadalsheiði. Klukkan 17:00 verður þjóðvegi 1 frá Varmahlíð að Öxnadalsheiði lokað og einnig þjóðvegi nr. 75 frá hesthúsahverfi á Sauðárkróki að Siglufjarðarvegi.

Fjölskylduþjónusta Sveitarfélagsins Skagafjarðar leitar eftir samstarfi við aðila til að taka börn í daggæslu á einkaheimili á Sauðárkróki eða nágrenni.

Fyrirhuguðum opnum fundi Matarkistunnar Skagafjarðar, sem átti að vera í dag kl. 16:30 í Húsi Frítímans, hefur verið frestað vegna veðurs.

Nú er desember genginn í garð og fram undan önnur helgin í aðventu. Það verður mikið um að vera í Skagafirði um helgina og einnig sunnan heiða tengt héraðinu. Jólamarkaður verður í Húsi frítímans báða helgardagana og einnig heimboð í Gallerí Rúnalist á Stórhóli í gamla Lýtingsstaðahreppi.