Sveitarstjórn Sveitarfélagins Skagafjarðar

Stefán Vagn Stefánsson lagði fram svohljóðandi tillögu:

"Lagt er til að Ásta Björg Pálmadóttir verði ráðin sveitarstjóri frá 17. september 2010 og formanni byggðarráðs og forseta sveitarstjórnar verði falið að ganga frá ráðningarsamningi til afgreiðslu sveitarstjórnar.

Stefán Vagn Stefánsson

Bjarni Jónsson"

Til máls tók Sigurjón Þórðarson sem óskar bókað: "Í ljósi erfiðrar fjárhagsstöðu Sveitarfélagsins Skagafjarðar og þeirrar hagræðingar sem boðuð er á rekstri er lagt að oddvitum meirihluta sveitarstjórnar að gæta hófs í samningum um kaup og kjör við nýjan sveitarstjóra. Lagt er til að laun nýs sveitarstjóra taki mið af þingfararkaupi alþingismanna."

Næst tók til máls Gréta Sjöfn Guðmundsdóttir og óskaði bókað: "Undirrituð situr hjá við afgreiðslu ráðningu sveitarstjóra. Meirihlutinn hefur alfarið leitt þá vinnu sem fram hefur farið í aðdraganda þess að ráða sveitarstjóra. Sú vinna hefur einkennst af vandræðagangi og tekið of langan tíma, en nú eru liðnir um þrír mánuðir síðan nýr meirihluti tók við. Mörg gríðarlega stór mál bíða, t.d. endurskoðun fjárhagsáætlunar og að taka á fjármálum sveitarfélagsins. Meirihlutinn hefur með þessum vandræðagangi sett sveitarfélagið í biðstöðu í allt sumar. Undirrituð býður Ástu Björgu Pálmadóttur velkomna til starfa og óskar henni velfarnaðar í starfi og væntir góðs samstarfs.

Gréta Sjöfn Guðmundsdóttir, fulltrúi Samfylkingarinnar"

Þá tók til máls Jón Magnússon sem lagði fram eftirfarandi bókun: "Fulltrúar Sjálfstæðisflokksins óska bókað að þau sitji hjá við atkvæðagreiðslu um ráðningu nýs sveitarsjóra Sveitarfélagsins Skagafjarðar. Fulltrúar flokksins hafa í engu átt aðkomu að því dæmalausa ráðningarferli, sem meirihlutafulltrúar Framsóknar og VG hafa staðið fyrir undanfarna þrjá mánuði. Þessi vinnubrögð að hálfu meirihlutans eru ekki sæmandi þeim sveitarstjórnarmönnum, sem vilja láta taka sig alvarlega á sviði stjórnmála. Verðandi sveitarstjóri sýnir mikla dirfsku og þor, að ætla að starfa undir leiðsögn forystusveitar núverandi meirihluta að lausn erfiðra verkefna sem framundan eru. Fulltrúar Sjálfstæðisflokksins bjóða Ástu Pálmadóttur velkomna til starfa og óska henni velfarnaðar í starfi sveitarstjóra Sveitarfélagsins Skagafjarðar."

Næst tók til máls Guðmundur Guðlaugsson og Sigurjón Þórðarson og fleiri ekki.

Tillagan samþykkt með sex atkvæðum.