Sveitarstjórn Sveitarfélagins Skagafjarðar

Fundargerð 57. fundar fræðslunefndar lögð fram til afgreiðslu á 263. fundi sveitarstjórnar eins og einstök erindi bera með sér. Sigurður Árnason kynnti fundargerð. Enginn kvaddi sér hljóðs.

Fundargerðir Heilbrigðisnefndar Norðurlands vestra, frá 4. mars og 27. apríl 2010 lagðar fram til kynningar á 263. fundi sveitarstjórnar

Fundargerð Menningarráðs Norðurlands vestra frá 24. mars 2010 lögð fram til kynningar á 263. fundi sveitarstjórnar.

Fundargerð stjórnar SSNV frá 21. apríl 2010 lögð fram til kynningar á 263. fundi sveitarstjórnar. Sigurður Árnason kvaddi sér hljóðs.

Fundargerðir Norðurár bs - byggðasamlags um sorpeyðingu á Norðurlandi vestra, frá 11. janúar, 4. 15. og 31. mars, 14. april og 6. maí 2010 lagðar fram til kynningar á 263. fundi sveitarstjórnar.

Guðmundur Guðlaugsson tók til máls og skýrði reikninginn. Engar breytingar

hafa orðið frá fyrri umræðu. 

Niðurstöðutölur rekstrarreiknings ársins 2009 eru þessar; 

Rekstrartekjur fyrir A- og B- hluta sveitarsjóðs 3.086,6 mkr, þar af námu

rekstrartekjur A-hluta 2.689,4 mkr. Rekstrargjöld A-hluta sveitarsjóðs án

fjármunatekna og fjármagnsgjalda voru 2.691,1 mkr., en 2.955,3 mkr. í A og

B-hluta. Nettó fjármagnsliðir til gjalda hjá A-hluta sveitarsjóðs eru 143,1

mkr. og samantekið fyrir A og B hluta 320,3 mkr. 

Rekstrarniðurstaða er neikvæð í A-hluta að upphæð 166,3 mkr. og einnig í

samanteknum A og B hluta að upphæð 252,1 mkr. Eigið fé sveitarfélagsins í

árslok 2009 nam 1.298,7 mkr. samkvæmt efnahagsreikningi en þar af nam eigið

fé A-hluta 1.466,0 mkr. Langtímaskuldir A-hluta eru 1.282,5 mkr. og A og

B-hluta í heild 2.741,3 mkr. 

Lífeyrisskuldbindingar eru í heild 705,5 mkr. og skammtímaskuldir 750,1 mkr.

Á árinu breytti sveitarfélagið reikningsskilaaðferðum sínum á eftirfarandi

hátt.  Færsla leigusamninga fasteigna og annarra mannvirkja var innleidd í

samræmi við álit Reikningsskila- og upplýsinganefndar sveitarfélaga 1/2010.

Eru áhrif innleiðingarinnar færð á eiginfjárreikning þann 31. desember 2009

og lækkaði eigið fé sveitarfélagsins um 82,1 mkr. vegna þessa.  Einnig var

innleitt á árinu álit Reikningsskila- og upplýsinganefndar sveitarfélaga

2/2010 ? Færsla á lóðum og lendum í bókhaldi og reikningsskilum

sveitarfélaga. Innleiðing álitsins fól í sér breytingu á

reikningsskilaaðferðum sveitarfélagsins þar sem það færir nú til eignar

meðal varanlegra rekstrarfjármuna lóðir og lendur sem það hefur leigutekjur

af.  Vegna þessa hækkaði eigið fé sveitarfélagsins um 922,5 mkr.

Leggur sveitarstjóri til að ársreikningur 2009 verði samþykktur.

Páll Dagbjartsson tók til máls og lagði fram eftirfarandi bókun frá fulltrúum Sjálfstæðisflokksins vegna ársreiknings ársins 2009

Ársreikningur Sveitarfélagsins Skagafjarðar fyrir árið 2009 sýnir rekstrarhalla upp á rúmar 250 milljónir króna, en fjárhagsáætlun gerði ráð fyrir halla upp á rúmlega 170 milljónir.  Þarna er því aukinn rekstrarhalli síðasta árs um 80 milljónir.  Ársreikningurinn sýnir einnig að í árslok 2009 eru heildarskuldir og skuldbindingar sveitarfélagsins, A og B hluta, samtals 4,2 milljarðar króna. 

Þegar núverandi meirihluti tók við í júní 2006 námu sambærilegar skuldir sveitarfélagsins 3,1 milljarði. Til viðbótar má svo minna á að fjárhagsáætlun fyrir árið 2010 gerir ráð fyrir nýjum lántökum upp á rúmlega 500 milljónir.

Við fulltrúar Sjálfstæðisflokksins teljum, og það sjá flestir, að svona verður ekki haldið áfram til lengdar.  Meirihluti Framsóknarflokks og Samfylkingar hefur haldið illa á fjármálastjórninni  s.l. fjögur ár.  Það verður höfuðverkefni nýrrar sveitarstjórnar að koma skikki á fjármálin hjá sveitarfélaginu strax að afloknum kosnungum sem nú eru framundan.

Páll Dagbjartsson     

Sigríður Björnsdóttir     

Gísli Sigurðsson

Bjarni Jónsson kvaddi sér hljóðs og lagð fram eftirfarandi bókun.

Ársreikningur Sveitarfélagsins Skagafjarðar fyrir árið 2009 lýsir ágætlega slakri fjármálastjórn og skuldasöfnun meirihluta Framsóknarflokks og Samfylkingar á kjörtímabilinu, um það þarf ekki að hafa fleiri orð.

Vert er hinsvegar að minna á meðábyrgð sjálfstæðisflokksins sem ekki hafði athugasemdir við áætlanagerð og forgangsröðun meirihlutans og samþykkti fjárhagsáætlunina á sínum tíma. Þannig hefur Sjálfstæðisflokkurinn stutt ýmis umdeild útgjöld á kjörtímabilinu eins og milljónagreiðslur fyrir hönnunarvinnu við menningarhús ofaní íþróttasvæði Sauðárkróks svo einhver dæmi séu nefnd. Flokkurinn hefur lengst af verið í hlutverki áhrifalauss ábekinga meirihluta Framsóknar og Samfylkingar.

Sigurður Árnason tók til máls og lagði fram bókun fulltrúa Samfylkingar og Framsóknarflokks.

Bókun meirihluta.

Fjárhagsáætlun fyrir árið 2009 var unnin við erfiðar aðstæður og mikla

óvissu í kjölfar bankahrunsins haustið 2008. Við gerð áætlunarinnar var lögð áhersla á að verja störf  og standa vörð um grunnþjónustu. Breið samstaða var um áætlunina í sveitarstjórn og var hún samþykkt með átta samhljóða atkvæðum í sveitarstjórn.  Niðurstaða reksturs samstæðu sveitarfélagsins er í takt við áætlanir ef frá eru teknar varúðarniðurfærslur á móti kröfum og eignarhlutum í félögum sem eru óvenjumiklar en í takti við hið óvenjulega ástand sem uppi er.  

Verulegur árangur náðist í rekstri sveitarfélagsins á árinu 2009 og batnaði rekstrarafkoman um rúmlega 230 milljónir kr. frá árinu 2008. 

Áfram þarf að halda þétt utan um rekstur sveitarfélagsins til að tryggja

áfram góða þjónustu og að sveitarfélagð geti ráðist í nauðsynlegar framkvæmdir. Meirihluti Framsóknarflokks og Samfylkingar þakkar starfsmönnum sveitarfélagsins fyrir gott og óeigingjarnt starf að rekstri sveitarfélagsins á árinu 2009.

Þórdís Friðbjörnsdóttir

Gréta Sjöfn Guðmundsdóttir

Sigurður Árnason

Íris Baldvinsdóttir

Einar E. Einarsson

Sigurður Árnason lagði einnig fram tvær bókanir vegna bókanna fulltrúa Sjálfstæðisflokks og fulltrúa VG.

Vegna bókunar fulltrúa Sjálfstæðisflokksins vill undirritaður benda á að fulltrúar Sjálfstæðisflokksins samþykktu fjárhagsáætlunina á sínum tíma og frávik frá henni eru ekki veruleg ef frá eru teknar varúðarfærslur á móti

kröfum og vegna eignarhluta í félögum sem eðlilegar verða að teljast í ljósi þess ástands er sem er í samfélaginu. 

Vegna bókunar fulltrúa VG vill undirritaður benda á að skuldir sveitarfélagsins hafa frá ársreikningi 2006 hækkað minna en sem nemur

verðlagshækkunum samkvæmt vísitölu neysluverðs þrátt fyir að framkvæmt hafi verið fyrir rúman milljarð króna á árunum 2007-2009 og að hluti skulda

sveitarfélagsins sé gengistryggður. Sigurður Árnason.

Þórdís Friðbjörnsdóttir kvaddi sér hljóðs.

Ársreikningur Sveitarfélagsins Skagafjarðar og stofnana þess 2009, borin undir atkvæði og samþykkt samhljóða.